2013թ. ապրիլի 17-ի առավոտյան ժամը 6-ին փլվել է Մեղրիի կլոր աշտարակի հյուսիս-արևմտյան պատը: Աշտարակի հարևանությամբ ապրող տիկին Թամարան պատմեց, որ լուսադեմին արթնացել են ուժեղ աղմուկից և ցնցումից, մտածելով, որ հերթական երկրաշարժն է, տանից դուրս են եկել: Պարզվել է, որ փլվել է կլոր աշտարակի մուտքի պատը:

Այս հարցի շուրջ զրուցեցինք  ՀՀ   ՊՄՊ Սյունիքի մազային ծառայության պետի տեղակալ Ն.Հայրապետյանի հետ: Նա ասաց.

-Ելնելով հուշարձանների պահպանման, օգտագործման և վերականգնման ՀՀ կառավարության հաստատած կարգից, լուսանկարել և համապատասխան նամակով փլվածքի մասին տեղեկացրել եմ  ՀՀ  ՊՄՊ Սյունիքի մարզային ծառայության պետին: Նախատեսում եմ նաև վաղը հանդիպել Մեղրիի համայքապետ Ա.Հովհաննիսյանի հետ: Ակնկալում եմ քաղաքապետարանի աջակցությունը թափված քարեր հավաքման գործում, որպեսզի դրանք հնարավոր լինի օգտագործել  վերականգնման ժամանակ:

-Կոչ եմ անում բոլոր մեղրեցիներին, ովքեր այս օրերին կլինեն այդ տարածքում, օգնեն քարերի հավաքման գործում,-վերջում ասաց Ն.Հայրապետյանը:

Նշենք նաև, որ Մեղրիի 6 աշտարակները, այդ թվում՝ կլորը, ներառված են ՀՀ Սյունիքի մարզի պատմության և մշակույթի անշարժ հուշարձանների պետական ցուցակում:

Նյութի հեղինակ՝  Սաթիկ Հարությունյան