«Մի քանի սպաներ պաշտոնանկ են արվել». Արծրուն Հովհաննիսյանը՝ Մեղրիի դեպքի մասին

ՀՀ ՊՆ խոսնակ Արծրուն Հովհաննիսյանը ֆեյսբուքում գրառում է կատարել.

ՀՀ ԶՈւ-երում կարգազնացությունները և անհնազանդությունները անթույլատրելի են և պատժվելու են օրենքի ողջ խստությամբ: Նշված դեպքի կապակցությամբ, որը այնքան էլ ճիշտ չի ներկայացվել մամուլում, զորամասի վերադաս հրամանատարության կողմից անցկացվել է համապատասխան ծառայողական քննություն և որոշվել է պատժել ինչպես շարքային զինծառայողների, այնպես էլ հրամանատարական կազմին: Մի քանի սպաներ պաշտոնանկ են արվել: 
Զգուշացնում ենք, որ ԶՈւ-երի կարգապահության ու մարտունակության նկատմամբ ցանկացած ոտնձգություն իրականացնող զինծառայող, հետայսու էլ խստագույն պատժվելու է: Նման երևույթներն անթույլատրելի են: 
Հ.Գ. Ելույթ ունեցող ծնողի որդին, որպես զինծառայող մշտապես օգտվելով իր իրավունքներից, որպես միակողմանի ծնողազուրկ, ողջ ծառայության ընթացքում իրեն դրսևորել է որպես կարգազանց զինծառայող:



Ագարակի պղնձամոլիբդենային կոմբինատի պոչերը լցվել են կարճևանցիների այգիներ

Սյունիքի մարզի Մեղրի համայնքի Կարճևան բնակավայրի բնակիչները նամակներով դիմել են ՀՀ բնապահպանության նախարար Էրիկ Գրիգորյանին, «Ագարակի պղնձամոլիբդենային գործարան» ՓԲԸ-ի գլխավոր տնօրեն Անդրեյ Սինյակովին և Մեղրիի քաղաքապետ Մխիթար Զաքարյանին՝ պահանջելով լուծում տալ կոմբինատի կողմից իրենց հողատարածքների պարբերաբար աղտոտման խնդրին:

Նամակներում ասված է, որ «Ագարակի պղնձամոլիբդենային գործարան» ՓԲԸ-ի հանիքց դուրս եկող արդյունաբերական կեղտաջրերը սխալ ջրահեռացման հետևանքով Կարճևան գետի հունով հոսում, լցվում են կարճևանցիների այգիները, թունավորում հողը՝ դարձնելով անպիտան, իսկ բերքը՝ վնասակար առողջության համար: Այդ կեղտաջրերից հողի վրա առաջանում է ծանր մետաղներ պարունակող հաստ շերտով նստվածք:

Առավել մանրամասն սկզբնաղբյուր կայքում` ecolur.org

Տեղի ունեցավ սուբվեցիոն ծրագրերի շուրջ հանրային քննարկումը. Մեղրի

Մարտի 21-ին Մեղրիի համայնքապետարանի նիստերի դահլիճում տեղի ունեցավ  2019 թվականի պետական բյուջեից սուբվենցիաներ /նպատակային հատկացում/ ստանալու նպատակով նախատեսված ծրագրերի շուրջ հանրային քննարկումը:

Չնայած համայնքապետարանի կողմից պատշաճ իրազեկվել էր հանրային քննարկման մասին, տեղեկատվությունը տարածվել էր  meghrinews.com կայքով, սակայն հանդիպմանը ներկա էին ընդամենը  մի քանի ՀԿ-ների  ներկայացուցիչներ:

Մեղրի համայնքի ղեկավար Մխիթար Զաքարյանը ներկայացրեց ծրագրերը.

1.«Մեղրի քաղաքի մանկապարտեզի հիմնանորոգում»:

2.«Զբոսայգու հիմնում Մեղրի քաղաքում»:

3.«Ավտոկայանատեղիների և հարակից շուկաների կառուցում Մեղրիի մաքսակետին կից և Մ-2 միջպետական ճանապարհի հարևանությամբ և դրանց հարող տարածքների բարեկարգում»

4.«Մեղրի համայնքի Շվանիձոր գյուղի մանկապարտեզի և բուժկետի վերահատակագծում, վերանորոգում և Կարճևան գյուղի մանկապարտեզի վերանորոգում»:

5.«Մեղրի համայնքի Ագարակի և Վահրավարի գոյություն ունեցող ջրավազանների վերանորոգման և բարեկարգման, Կարճևան, Լեհվազ և Նռնաձոր գյուղերի նոր ջրավազանների կառուցման աշխատանքներ»:

Ծրագրերի ընտրության, առաջնահերթության և ֆինանսական օժանդակության մասին ներկաների հարցերին  պատասխանեց Մեղրի համայնքի ղեկավարը:

Մասնակիցները անդրադարձան  համայնքային այլ խնդիրների, հույս ունենալով հետագայում դրանք ևս լուծում կստանան: