“Եթե ուզում ես` պարիր”. այսպես էր կոչվում ապրիլի 16-ին Մեղրիի մշակույթի կենտրոնում կազմակերպված միջոցառումը, որի գեղարվեստական ղեկավարն էր Աննա Համբարձումյանը:

Պարը հոգու թռիչքն է և այդ թռիչքին ունկնդիր 7-15 տարեկան 16 աղջիկներ սիրով մասնակցեցին պարի այս մրցույթին: Մասնակիցներից յուրաքանչյուրը ընտրել էր պարային իր ոճը: Բավականին ոգևորիչ և լարված էր ոչ միայն հանդիսատեսը, այլև՝ ժյուրին:

Թեև ծափողջյունները, ոգևորող ցուցապաստառները կարծես դժվարացնում էին ժյուրիի աշխատանքը, այնուամենայնիվ գնահատման իր չափորոշիչների մեջ արդարացի գտնվեց ժյուրին, որը ըստ տարիքային խմբերի առաջին մրցանակային տեղեր բաշխեց 8 ամյա Անահիտ Սարգսյանին (քաղաք Մեղրի) և 12 ամյա Մարգարիտա Ահարոնյանին (քաղաք Ագարակ): Առավել ձայներ ստացած 7 ամյա Նարե Մարտիրոսյանը արժանացավ “Հանդիսատեսի համակրանք” մրցանակին: Տարբեր նոմինացիաների արժանացան նաև մյուս մասնակիցները:

Նյութի հեղինակ՝ Թագուհի Մարգարյան