-“Քրիստոս հարյավ ի մեռելոց”. “Օրհնյալ է Հարությունը Քրիստոսի”. “Մեզ և ձեզ մեծ ավետիս”,-մարտի 31-ին ահա այս խոսքերով էին Մեղրիի բնակիչները ողջունում միմյանց: 

Սուրբ Զատիկը Հայ առաքելական եկեղեցու հինգ Տաղավար տոներից մեկն է և ամենախոշորը` նվիրված  Հիսուս Քրիստոսի Հարությանը: Եկեղեցին Հիսուսի Հարությունը տոնում է որպես Զատիկ, քանի որ նա համարվում է հավիտենական այն զոհը կամ պատարագը, որի միջոցով մարդը ստանում է մեղքերի թողություն, ապա` կյանք և հարություն:

Մարտի 31-ին՝ առավոտյան ժամը 11.00-ին, Մեղրիի Սուրբ Աստվածածին եկեղեցում կատարվեց ժամերգություն, Անդաստանի արարողություն, ապա մատուցվեց պատարագ՝ նվիրված Սբ. Զատկի տոնին, իսկ  նախընթաց երեկոյան եկեղեցում կատարվել էր Ճրագալույց և դրանով ավարտվել էր Մեծ Պահքի շրջանը:

Սուրբ պատարագից հետո ներկաներին բաժանեցին հարության և նոր կյանքի սկզբնավորման խորհրդանիշ հանդիսացող կարմիր ներկված հավկիթներ և մատաղ, որը նախկինում տալիս էին հատկապես աղքատներին ու կարիքավորներին:

Զատկի տոնը նշվեց մեծ խանդավառությամբ՝ եկեղեցական տոնին համապատասխան: Ընդունված է, որ այդ օրը սեղանները պետք է առատ լինեն չամչով և չրերով եփած փլավով, ներկված հավկիթներով, ձկով, բանջարեղենով: 

Նյութի հեղինակ՝ Անի Սարգսյան