Երգ, պար, նկարչություն, ասեղնագործություն, կլառնետի ու դաշնամուրի դասեր…
Գեղագիտության ազգային կենտրոնի Մեղրու մասնաճյուղում սեպտեմբերի 1-ից  սկսվեց ուսումնական տարին:
Կենտրոնի տնօրեն Ստյոպա Գրիգորյանը նշեց՝
-Ես ուզում եմ, որ մեղրեցի երեխան շատ լավ պարի, լավ նկարի, ես ամեն ինչ անում եմ, որ մեղրեցի երեխան իրեն լավ զգա:
-Գեղագիտական ազգային կենտրոնը ակտիվացնում է մշակույթային կյանքը, մեր երեխաները մասնակցում են Մեղրիում տեղի ունեցող բոլոր միջոցառումներին՝ պարում, երգում ու նվագում են, ցուցադրում են իրենց ստեղծագործությունները:

Խմբակների համար անհրաժեշտ աշխատանքային նյութերի, պարի հագուստների մի մասը ձեռք է բերում կենտրոնը, մի մասն էլ՝ ծնողները:

ԳԱԿ Մեղրու մասնաճյուղի պատերը զարդարում են երեխաների աշխատանքները:

– Երբեմն տուրիստների կողմից մեր սաների աշխատանքները գնելու ցանկություն է լինում, բայց դրանք չեն վաճառվում, երեխաների աշխատանքները պահվում են կենտրոնում:

Ասեղնագործության խմբակի սաները Մեղրին խորհրդանշող աշխատանքներ են պատրաստում և արդեն ցուցահանդեսների են մասնակցում:

Պարոն Գրիգորյանի խոսքով՝ ծնողների կողմից դհոլի և կիթառի խմբակներ ունենալու ցանկություն կա, բայց մասնագետների պակաս ունեն, այնուհանդերձ պատրաստվում են կիթառի սիրողական խումբ բացել:

Պարուսույց ընկեր Աստղիկի խոսքով ՝ երեխաները մեծ ոգևորությամբ ու  հաճույքով են գալիս պարի:

­- Ուրախությամբ եմ լցվում ու հպարտանում, երբ պարի դպրոցի սաները այլ բեմերում ու դպրոցական միջոցառումներին էլ են պարում:

Հոգատար, աշխատասեր, բարի … երեխաները ընկեր Աստղիկին այսպես են բնորոշում:

Այս տարվա պարի խմբակի առաջին դասին երեխաները եկել էին դասացուցակն իմանալու՝  առանց պարային հագուստների:

Երիտասարդների մեդիա թիմ՝ Անի, Էլեն