Մեղրի համայնքը իր աշխարհագրական դիրքով, բնական հուշարձաններով, պատմամշակույթային վայրերով, յուրօրինակ բնակլիմայական պայմաններով կարիք ունի ճանաչելիության բարձրացման: ՀԵնց այս նպատակին է ուղղված «Մեղրու կանանց ռեսուրս կենտրոն» ՀԿ-ի կողմից իրականացվող «Այցելեք Մեղրի» ծրագիրը:
Ծրագրի արդյունքում ստեղծվելու է «Այցելեք Մեղրի» / «Welcome to Meghri» / տուրիստական կենտրոնը: Տարածաշրջանում կտեղադրվեն գովազդային վահանակներ, կնկարահանվեն տեսահոլովակներ:
Ստեղծվելու է արշավներ կազմակերպող կազմակերպությունների և անհատների, հյուրընկալող ընտանիքների, երիտասարդ ուղեկցորդների, գյուղմթերքներ արտադրողների, կարպետագործների համագործակցային ցանց` Մեղրի համայնքում էկո և գյուղատնտեսական տուրիզմի զարգացման նպատակով:
Ծրագրային թիմն արդեն հանդիպումներ է ունեցել Մեղրի համայնքի բնակավայրերում, Մեղրու պետական քոլեջում` ներկայացրել ծրագրի նպատակներն ու գործողություները, հավաքագրել անհրաժեշտ ռեսուրսներ, լսել տեղացիների կարծքիներն ու խնդիրները:
-Մեղրին պետք է զբոսաշրջիկների համար ցանկալի տարածք դառնա և դրան հասնելու համար անելու ենք ամեն հնարավորը, – իր խոսքը այսպես է սկսում ծրագրի ղեկավար Արսեն Մկրտչյանը:
Հանդիպումներն անցնում են քննարկումների մթնոլորտում, գյուղացիները ներկայացնում են իրենց տան պայմանները, գյուղում առկա խնդիրները, գյուղի ավանդական պատմությունները, որոնք կարծես տարիների խորքում են մնացել:
Մարդկանց աչքերում ոգևորության փայլ է նշմարվում` շուտով դրսից հյուրեր են ունենալու, արդեն մտածում են հյուրերին ընդունելու, իրենց տարածքների տեսարժան վայրերը ներկայացնելու մասին: Երբեմն էլ մտավախություն են հայտնում` հանկարծ չփչացնեն իրենց ունեցած հարստությունը:
Ալվանք գյուղում ենք: Տիկին Շողակաթը նշում է.
-Երկար ժամանակ է ընտանիքով մտածում ենք հյուրերի կացարան ստեղծելու մասին, հուսով եմ ծրագիրը նոր հնարավորություններ կտա:
Իսկ տիկին Հասմիկն էլ մեջբերում է.
– Զբոսաշրջիկներին հաստատ դուր կգա նռան հյութ պատարաստելու ընթացքը, ողջ գյուղը մեր տանն է նռան հյութ պատրաստում, ինքնաշեն ճզմող սարք ենք ստեղծել:
Ելենային, ով արդեն 2 տարի է զբաղվում է կարպետագործությամբ, ոգևորել է արհեստանոցի ստեղծման միտքը:
Կարճևանում տեղացիները քննարկում են գյուղի բարձրունքում գտնվող երկհարկանի տան, որին նրանք Ֆունիկլյոր են անվանում, պահպանման անհրաժեշտությունը:
-Բոլորով կհավաքվենք, զբոսաշրջիկներ համար ջերմ միջավայր կստեղծենք, գյուղի պատմություններից կզրուցենք:
Ծրագրի ղեկավար Արսեն Մկրտչյանը վերջում հավելում է.
– Մեղրիում առկա յուրաքանչյուր վայր բացահայտելիս, նորից ու նորից համոզվում եմ` զբոսաշրջությունն այստեղ զարգացման մեծ հեռանկար ունի:
Ծրագիրը իրականացվում է «Պահպանվող Տարածքների Աջակցման Ծրագիր-Հայաստան» Տեղական ՀԿ-ների համար Փոքր Դրամաշնորհային ծրագրի շրջանակներում:
meghrinews 