Նոյեմբերի 11-13-ը Վրաստանի Հանրապետության Ամբրոլաուրի քաղաքում տեղի ունեցավ  աշխարհի կրկնակի չեմպիոն և օլիմպիական խաղերի արծաթե մեդալակիր Գուրամ Սահարաձեի մրցաշարը, որից Ագարակ քաղաքի պատանի ըմբշամարտիկները վերադարձան մեդալներով:

Մրցաշարին մասնակցում էին 300 մարզիկներ՝ Ռուսաստանից, Վրաստանից,Ադրբեջանից և Հայաստանից:

Ագարակից մասնակցում էին 11 ըմբիշներ, նրանցից 69 կգ քաշային կարգում Էդուարդ Վարդանյանը գրավեց՝ երկրորդ, իսկ  26 կգ քաշային կարգում Տիգրան Բունիաթյանը՝ երրորդ տեղը:Մարզիչ Յուրի Ավետիսյանը գոհ է արդյունքներից.

-Մի քիչ փորձի պակաս ունեն, բայց ամեն ինչ անում ենք առաջ ընթանալու համար: Պատանիները ատամները սրած սպասում էին մենամարտի:

10 ամյա Տիգրանը իր իսկ  ցանկությամբ է որոշել մարզվել: Առաջինը ըմբշամարտի տղաներն են շնորհավորել, ծնողներն ու դպրոցի աշակերտները նույնպես շնորհավորանքներով են դիմավորել, բայց ինչպես ինքն է ասում՝

-Մի փոքր լավ չեմ զգում, որ 3-րդ տեղ եմ գրավել: Նպատակ ունեմ սրանից հետո միշտ հաղթող լինել:

Էդուարդը 3 տարի է ինչ մարզվում է, հենց սկզբից գիտակցել է, որ ըմբշամարտը իրենն է: Մրցումներից առաջ հաղթանակի մասին էր մտածում, հիմա ավելի վստահ է իր ուժերին: Նպատակ ունի մյուս տարի Հայաստանի առաջնությանը մասնակցելու և լավ արդյունքներ գրանցելու:

Վաստակավոր մարզիչ Յուրի Ավետիսյանը Երևանից Ագարակ է տեղափոխվել՝ այստեղ զարգացնելու ըմբշամարտը.
-Զրոից ենք սկսել, 5-6  տարի հետո կարգին մարզիկներ են դառնալու՝ Աշխարհի և Եվրոպայի մակարդակով, աշխատում, դրան ենք ձգտում, ամեն օր պարապում ու մարզվում ենք:
Մարզչական խստությամբ է վերաբերում պատանիներին.
-Շատ խիստ եմ, եթե խիստ չլինեմ, կարգապահություն չի լինի, սպորտսմեն չեն դառնա:Ամեն ինչ անում ենք, որ մոտ ապագայում Ագարակ քաղաքից Աշխարհի ու Եվրոպայի մրցանակակիր ունենանք:

Իր խոսքում մարզիչը նշեց, որ տեղափոխվել է Ագարակ աշխատելու համայնքի ղեկավար Մխիթար Զաքարյանի հրավերով, ով ամեն տեսակ աջակցություն է ցույց տալիս մինչ այսօր: Մարզիկների համար ըմբշամարտի դպրոցն անվճար է: